Gen 41 | NdeIBE | STEP | Kwathi sekudlule iminyaka emibili egcweleyo uFaro waphupha: Wazibona emi ekhunjini likaNayili,

Genesis 41

Amaphupho kaFaro

1 Kwathi sekudlule iminyaka emibili egcweleyo uFaro waphupha: Wazibona emi ekhunjini likaNayili, 2 kwasekuqhamuka emfuleni lowo amankomokazi ayisikhombisa, egcwele enonile, esidla phakathi kwemihlanga.

3 Ngemva kwawo kwathutsha amanye ayisikhombisa, amabi, njalo acakileyo ephuma kuNayili afika ema eceleni kwalawo ayesekhunjini lomfula. 4 Kwathi amankomokazi lawo ayemabi ecakile aginya lawo ayisikhombisa ayegcwele enonile. UFaro wasephaphama.

5 Wabuye walala waphupha okwesibili: Izikhwebu zamabele eziyisikhombisa, zigcwele zinhle, zazikhula ehlangeni lunye. 6 Ngemva kwazo kwakhula ezinye izikhwebu eziyisikhombisa – zicakile njalo zibuniswe ngumoya wasempumalanga. 7 Izikhwebu lezo ezazicakile zaginya lezo eziyisikhombisa ezaziphilile, zigcwele. UFaro wasephaphama, kwakuliphupho nje.

8 Ekuseni umoya wakhe wawukhathazekile, yikho wasesithi kakubizwe bonke omasalamusi lezihlakaniphi zaseGibhithe. UFaro wabatshela amaphupho akhe, kodwa kakho owakwaziyo ukuwachasisa.

9 Yikho umphathinkezo omkhulu wathi kuFaro, “Lamuhla sengikhumbula amaphutha ami. 10 Kwake kwathi uFaro wazondela izinceku zakhe, wangitokisisa mina kanye lompheki omkhulu endlini kandunankulu wabalindi.

11 Ngamunye wethu waba lephupho ngobunye ubusuku bunye, kwaba yilelophupho lilencazelo yalo lodwa. 12 Kwakulejaha lomHebheru khonapho lathi, liyinceku kandunankulu wabalindi. Salitshela amaphupho ethu, wasicasisela wona, esipha ngulowo ingcazelo yephupho lakhe. 13 Izinto zacina zisima njengokusicasisela kwakhe: ngabuyiselwa esikhundleni sami, lomkhula wami walengiswa.”

14 Yikho uFaro wabiza uJosefa, walethwa masinyane esuka entolongweni. Kwathi esephucile indevu, wantshintsha izigqoko weza phambi kukaFaro.

15 UFaro wathi kuJosefa, “Ngiphuphile iphupho kodwa kakho ongangicasisela lona. Kodwa ngizwa kuthiwa wena, nxa ungalizwa iphupho uyalicasisa.”

16 UJosefa wamphendula uFaro wathi, “Ngeke ngikwenze, kodwa uNkulunkulu uzamnika uFaro impendulo ayidingayo.”

17 UFaro wasesithi kuJosefa, “Ephutsheni lami bengimi ekhunjini likaNayili,

18 ngasengibona kuqhamuka amankomokazi ayisikhombisa, anonileyo, egcwele, esidla phakathi kwemihlanga. 19 Ngemva kwawo kwaqhamuka amanye amankomokazi ayisikhombisa – etshwabhene, emabi kakhulu futhi ecakile. Ngangingakaze ngibone amankomokazi amabi kangako kulo lonke elaseGibhithe. 20 Lawo mankomokazi acakileyo, amabi adla layana amankomokazi ayisikhombisa ayenonile ayiwo aqhamuka kuqala. 21 Kodwa loba esewadlile lawo kakho owayengatsho ukuthi atheni; ayelokhu emabi njengakuqala. Yikho ngasengiphaphama.

22 “Emaphutsheni ami ngibone njalo izikhwebu zamabele eziyisikhombisa, zigcwele, njalo zinhle zikhula ehlangeni lunye. 23 Ngemva kwazo, kwahluma ezinye izikhwebu eziyisikhombisa – zibunile njalo zicakile, zitshazwe ngumoya wempumalanga.

24 Lezozikhwebu zamabele ezicakileyo zaginya leziyana eziyisikhombisa ezinhle. Ngibatshelile omasalamusi ngalokhu kodwa kakho okwazileyo ukungicasisela.”

25 UJosefa wasesithi kuFaro, “Amaphupho kaFaro ayilutho lunye. UNkulunkulu usevezile kuFaro lokho asezakwenza. 26 Amankomokazi ayisikhombisa amahle ayiminyaka eyisikhombisa, njalo lezikhwebu zamabele ezinhle ziyiminyaka eyisikhombisa; kuliphupho linye.

27 Amankomokazi ayisikhombisa eza muva yiminyaka eyisikhombisa, kanjalo lezikhwebu eziyisikhombisa ezazingelamsebenzi, zitshazwe ngumoya wempumalanga: Yiminyaka eyisikhombisa yendlala.

28 “Kunjengokuba ngitshilo kuFaro. UNkulunkulu usevezile kuFaro lokho azakwenza. 29 Sekusiza iminyaka eyisikhombisa eyenala enkulu kulo lonke elaseGibhithe,

30 kodwa izalandelwa yiminyaka eyisikhombisa eyendlala. Kuzakuthi yonke inala enkulu eGibhithe, ikhohlakale, ngoba indlala izalibhubhisa ilizwe. 31 Inala elizweni izabe ingasakhunjulwa, ngoba indlala eyilandelayo izabe inkulu kakhulu. 32 Isizatho sokuthi iphupho liphiwe uFaro ngezindlela ezimbili yingoba indaba isimisiwe yaqiniswa nguNkulunkulu, njalo uNkulunkulu ezakukwenza masinyane.

33 “Akuthi-ke uFaro adinge indoda elombono ehlakaniphileyo ayibeke phezu kwelizwe laseGibhithe. 34 UFaro abesekhetha abalisa elizweni abazathatha ingxenye eyodwa kwezinhlanu yesivuno saseGibhithe ngeminyaka yenala eyisikhombisa. 35 Kumele baqoqe konke ukudla ngale iminyaka emihle ezayo bakugcine ukudla ngaphansi kukaFaro, kugcinwe emadolobheni ukuthi kube yikudla.

36 Ukudla lokhu kakugcinelwe ilizwe kulondolozelwe ukusetshenziswa ngeminyaka eyisikhombisa yendlala ezafika eGibhithe, ukwenzela ukuthi ilizwe lingabhujiswa yindlala.”

37 Icebo leli lakhanya lilihle kuFaro lakuzo zonke izikhulu zakhe. 38 UFaro wasezibuza wathi, “Kambe singamfumana yini omunye onjengendoda le, umuntu olomoya kaNkulunkulu?”

39 UFaro wasesithi kuJosefa, “Njengoba uNkulunkulu esekwazisile konke lokhu, kakho olombono onje lohlakaniphileyo njengawe.

40 Wena-ke usuzaphatha isigodlo sami, kuthi bonke abantu bami bazalalela iziqondiso zakho. Mina ngizaba mkhulu kulawe ngesikhundla sesihlalo sobukhosi sami kuphela.”

UJosefa Uphatha Ilizwe laseGibhithe

41 Yikho uFaro wasesithi kuJosefa, “Sengikubeka ukuthi wena uliphathe lonke ilizwe laseGibhithe.” 42 UFaro wasethatha indandatho yophawu lwakhe eyayisemunweni wakhe wayifaka emunweni kaJosefa. Wamgqokisa izingubo zelineni elihle wamgqizisa iketane yegolide entanyeni.

43 Kwathiwa usezahamba ngenqola yempi njengoba esenguye umsekeli wakhe oseduze, kwathi edlula abantu bahalalisa bathi, “Vulani indlela!” Wambeka-ke ukuthi aphathe ilizwe lonke laseGibhithe.

44 UFaro wasesithi kuJosefa, “Mina nginguFaro, kodwa ngaphandle kwelizwi lakho kakho ozasiphakamisa isandla loba unyawo kulo lonke elaseGibhithe.”

45 UFaro wetha uJosefa ibizo elithi Zafenathi-Phaneya, wamupha u-Asenathi indodakazi kaPhothifera, umphristi wase-Oni ukuba abe ngumkakhe. UJosefa walibhoda lonke ilizwe laseGibhithe.

46 UJosefa wayeleminyaka engamatshumi amathathu yobudala eqalisa ukusebenzela uFaro inkosi yaseGibhithe. UJosefa wasuka phambi kukaFaro walibhoda lonke ilizwe laseGibhithe. 47 Ngeminyaka eyisikhombisa eyenala umhlaba wathela ukudla okunengi kakhulu. 48 UJosefa wakuqoqa konke ukudla okwavunwa phakathi kwaleyominyaka eyisikhombisa eyenala eGibhithe wakulondoloza emadolobheni. Kulelo lalelo idolobho wabeka ukudla okwakulinywa emasimini aleyondawo. 49 UJosefa waqoqa izinqwaba lezinqwaba zamabele, kwaba njengetshebetshebe lolwandle. Kwaba kunengi waze wayekela ukukubhala phansi ngoba kwasekungaphezu kokulinganiswa.

50 Ingakafiki iminyaka yendlala, u-Asenathi, indododakazi kaPhothifera, umphristi ka-Oni wazalela uJosefa amadodana amabili. 51 UJosefa wetha izibulo lakhe wathi nguManase, esithi, “Kungenxa yokuthi uNkulunkulu wenzile ukuthi ngilukhohlwe lonke uhlupho lwami kanye layo yonke indlu kababa.”

52 Indodana yesibili wayibiza ngokuthi ngu-Efrayimi, wathi, “Kungenxa yokuthi uNkulunkulu ungenze ngaba lezithelo elizweni lokuhlupheka kwami.”

53 Iminyaka yenala eyisikhombisa eGibhithe yaphela, 54 kwaqalisa iminyaka yendlala eyisikhombisa, njengoba uJosefa wayetshilo. Indlala yaba khona kuwo wonke amanye amazwe, kodwa kulo lonke ilizwe laseGibhithe ukudla kwakukhona. 55 Kwathi lapho iGibhithe lonke selingenelwa yindlala abantu bazibika kuFaro befuna ukudla. Yikho uFaro wasebatshela bonke abaseGibhithe wathi, “Yanini kuJosefa lenze lokho alitshela khona.”

56 Kwathi indlala isimemetheke kulo lonke ilizwe uJosefa wavula iziphala wawathengisela amaGibhithe ukudla ngoba indlala yase ibhahile kulo lonke ilizwe laseGibhithe.

57 Kwathi wonke amanye amazwe eza eGibhithe ezothenga amabele kuJosefa, ngoba indlala yayibhahile kuwo wonke umhlaba.